Málfræði
Fann fjársjóð á Mont Blanc
Skylduverkefni:
Leystu fimm verkefni af þessum lista.
-
Finndu 5 nafnorð í textanum.
-
Finndu 3 nafnorð í fleirtölu.
-
Finndu 3 nafnorð í eintölu.
-
Finndu 3 nafnorð með greini.
-
Finndu 3 nafnorð án greinis.
-
Finndu 2 töluorð.
-
Finndu 5 sagnorð.
-
Finndu 3 sagnorð í þátíð.
-
Fallbeygðu orðin franskur fjallgöngumaður.
-
Segðu í hvaða kyni orðin eru: fjallgöngumaður, fjársjóður, fjallsins, milljónir, króna, smaragðar, roðasteinar, flugvél, árum.
Franskur fjallgöngumaður sem gekk á Mont Blanc fann nýverið fjársjóð í hlíðum fjallsins. Fjársjóðurinn er metinn á rúmlega 40 milljónir króna. Fjársjóðurinn var í stálboxi, en í því voru smaragðar, roðasteinar og safírar. Boxið er talið vera úr flugvél sem fórst í fjallinu fyrir um 50 árum síðan. Fjallgöngumaðurinn skilaði fjársjóðnum til lögreglunnar.
Sylvain Merly, talsmaður frönsku lögreglunnar, segir að fjallgöngumaðurinn hafi áttað sig á að fjársjóðurinn tilheyrði einhverjum sem fórst á fjallinu. Hún segir að poki í boxinu hefði verið með áletrunina „Made in India“. Franska lögreglan er að reyna að grafast fyrir um hver gæti hafa átt fjársjóðinn. Hún hefur haft samband við yfirvöld á Indlandi. Samkvæmt lögum í Frakklandi er finnandi fjársjóðs lögmætur eigandi hans ef ekki tekst að hafa upp á eigandanum.
Tvær indverskar flugvélar fórust við Mont Blanc 1950 og 1966. Fjallgöngumenn sem ganga á fjallið finna öðru hverju brak og líkamsleifar úr flugvélunum.
